ដំណឹងល្អ! យុវជន​សំរាម​ ​មានក្តី​រំភើប​ជាខ្លាំង​ ដែលនៅក្នុងថ្ងៃនេះ​ អ្នក​កាសែត​ជប៉ុន​ បាន…

កន្លង​មក​នេះ​​ គេសង្កេត​ឃើញថា​ ​សំរាម​នៅតែជាបញ្ហាដ៏ចំបងមួយ​ ដែលមានមនុស្ស​មួយ​ចំនួន​ នៅតែ​បន្តការបោះចោល​សំរាម​នៅ​តាម​ទី​សាធារណៈ​ ដែលនេះហេីយ​ គឺជា​មូលហេតុ​អាចបង្កឲ្យ​បរិស្ថា​កខ្វក់​ គ្មាន​សណ្តាប់​ធ្នាប់​ និង​មិនទទួលបាន​នូវ​សោភ័ណភាព​ល្អ​ក្នុង​ទីក្រុង​ ឬទី​ប្រជុំជន​ ក៏ដូចជា​បង្កឲ្យ​ប៉ះពាល់​ជាខ្លាំង​ដល់​សុខ​ភាព​ជាដេីម​នោះ​ ។

ជុំវិញ​បញ្ហា​ខាង​លើនេះ​ ក៏ត្រូវបាន​យុវជន​ស្ម័គ្រ​ចិត្ត​មួយក្រុម​ ដែលមានការ​ដឹកនាំ​ និង​ផ្តួចផ្តើម​ដោយ​បុរសម្នាក់ឈ្មោះ​ សាន ដារ៉ាវីត​ បាននាំគ្នា​បេីក​យុទ្ធនាការ​ប្រមូល​សំរាម​ក្នុង​ទីក្រុង​ ដោយមានការ​ចាប់​ផ្ដើម​ពី​ ប្រឡាយ​លូទឹកស្អុយ​បឹងត្របែក​ រហូត​មកដល់​ពេលនេះ​ គឺទទួល​បាននូវ​លទ្ធផល​ដ៏ប្រសេីរបំផុត។

ក្នុង​នោះដែរ​ យុវជនសំរាម​ ត្រូវ​បាន​មជ្ឈដ្ឋាន​ទូទៅ​មានការ​កោតសរសើរ​ជាខ្លាំង​ ចំពោះ​កិច្ចការ​ងារខិតខំប្រឹងប្រែងរបស់ពួកគេ​ បេីទោះជាមិនទទួលបាន​នូវ​អត្ថប្រយោជន៍​អីសោះក៏ដោយ ក៏ពួកគេនៅតែមានការតាំងចិត្តខ្ពស់​ ដេីម្បី​សម្រេច​ឲ្យ​បាន​ នូវគោលបំណង​ ដែលពួកគេធ្លាប់បានមានក្តី​រំពឹងទុកមុនមកនោះ។

ជាលទ្ធផល​ ចំពោះ​កិច្ចការ​ខិតខំ​ប្រឹងប្រែង​របស់​យុវជន​សំរាមកន្លងមកនោះ​ ក៏ត្រូវបាន​លេច​ព័ត៌មាន​ល្បី​ដល់ក្រៅប្រទេសទៀត​ ផង​ លេីសពីនេះ​ លោក​ សាន​ ដារ៉ាវីត​ ក៏មានក្តីរំពឹងថា​ លោក​ រួម​ជាមួយ​យុវជន​សំ​រាម​ នឹងមាន​ឱកាស​ចេញទៅ​ទស្សនកិច្ច​ក្រៅប្រទេស​ ដេីម្បី​ធ្វើ​ការស្វែងយល់​ និង​សិក្សា​បន្ថែម​ទៀត។

នេះ​បេីយោងតាម​រយៈ​គណនី​ហ្វេសបុកផេក​ឈ្មោះ​ Life Unlock បានមានការ​បញ្ជាក់ថា​៖​ «ថ្ងៃនេះខាងកាសែតជប៉ុន​ មកសំភាសន៍ដល់កន្លែង អំពីការផ្លាស់ប្តូរផ្នត់គំនិត​ ប្រជាជនកម្ពុជា និងការផ្លាស់ប្តូរមុខមាត់ថ្មី​នៃទីក្រុងភ្នំពេញ!!​ សង្ឃឹមថា ឆ្នាំ2020 ក្រុមយុវជនសំរាមនឹងបានទៅទស្សនកិច្ចនៅប្រទេសជប៉ុន»។